Türk dili

      Türkmenistan ýurdumyzyň alyp barýan içerki we daşarky syýasaty şu günlerki Berkarar döwletiň täze eýýamynyň Galkynyşy döwründe Watanymyzyň mundan beýläk-de gülläp ösmegine ägirt uly itergi berýär. Ykdysadyýetimiziň ähli pudaklary pajarlap ösýär, ylymda we bilimde düýpli özgerişler dowam edýär. Bilim edaralary häzirki zaman ösen tehniki serişdeler, şol sanda kompýuterler bilen doly abzallaşdyrylýar.

          Hormatly Prezidentimiz Serdar Berdimuhamedowyň ýolbaşçylygynda ýurdumyzyň ähli ulgamlarynda, şonuň bilen birlikde, ylym-bilimde amala aşyrylýan düýpli täzelenişlere, uzak geljegi nazarlaýan giň gerimli maksatnamalara täze badalgalar berilýär.

 Gysga möhletli okuwlarda türk dilini okatmagyň esasy maksady bu dili öwrenýän adamyň türkmen dilinde erkin gepläp, ýazyp, okap, düşünip we belli bir derejede terjime edip bilmegini gazanmakdan ybaratdyr. Dil öwrenmäge gelýän diňleýjileriň ýaş aýratynlyklaryny, bilim derejelerini, hünärlerini, ene dillerini we beýleki taraplaryny nazara alyp, gysga möhletli okuwlarda türk dili öwredilen mahalynda, umuman, şu aşakdaky maksatlar öňde goýulýar:

• Sözleýiş dil endiklerini we başarnyklaryny ösdürmek.
• Geljekde dili özbaşdak öwrenmeklerini dowam etdirip bilmekleri üçin zerur bolan dil esaslaryny özleşdirmeklerini gazanmak.
• Türk diliniň gepleşik dilinde işjeň ulanylýan dil dessury kadalaryny öwretmek we diňleýjileriň dogry gepläp, ýazyp we okap bilmeklerini üpjün etmek;
• Türk diliniň gepleşikde köp duş gelýän sözlerini we söz düzümlerini, şeýle hem diňleýjileriň hünärleri bilen baglanyşykly zerur bolan adalgalary öwretmek;
• Dili öwrenijilere erkin söhbetdeşlik, tanyş bolmak, telefon arkaly gepleşmek, işe ýerleşmek, işjeň duşuşyklary geçirmek, şahsy we gulluk saparlarynda dil kynçylygyny ýeňip geçmek, bilet buýurmak, myhmanhana ýerleşmek, restoranda, dükanda bolmak, lukmana ýüz tutmak, şertnama baglaşmak we ş.m. zerurlyklardaky endikleri öwretmek.

Gysga möhletli dil okuwlarynda türk dilini öwretmegiň netijeli bolmagy üçin şu aşakdakylar esasy çözülmeli meseleler bolup durýar.

• Türk diliniň seslerini we olaryň aýdylyş aýratynlyklaryny öwretmegiň meseleleri;
• Türk dilinde çekimli sesleriň (hususan-da, i sesiniň) gysga aýdylyşyny, käbir çekimlileriň (hususan-da, i sesiniň) açyk aýdylyşyny öwretmegiň meseleleri;
• Türkmen we türk dilleriniň leksiki we many meňzeşligidir aýratynlyklaryny öwretmegiň meseleleri;
• Dürli dillerde gepleýän diňleýjileriň ählisi üçin peýdaly boljak umumy okadyş usulyýetini tapmaklygyň meseleleri;
• Temalar geçilende, diňleýjiniň kabul ediş ukybyna görä çemeleşmegiň meseleleri we ş.m.

Türk dili öwredilen mahalynda, esasan, Türkiýäniň dil öwrediş merkezlerinde, şeýle hem, Türkmenistandaky gysga möhletli dil okuwlarynda synagdan üstünlikli geçen okuw gollanmalaryndan peýdalanylýar. 

Okuw tamamlandan soňra diňleýjiler alan bilimlerini öz hünär işinde ulanyp bilýär.

Okuwlary Magtymguly adyndaky Türkmen döwlet uniwersitetiniň mugallymlary okadýar.

Okuwlar Magtymguly adyndaky Türkmen döwlet uniwersitetiniň çäginde sagat 17:00 dan soň gurnalýar. 

Okuwyň tölegi:

I dereje, 75 sagat üçin - 920 manat

II dereje, 70 sagat üçin - 860 manat

Tölegler nagt we nagt däl görnüşinde amala aşyrylýar.